Dewch yn Gydymaith
Ymrwymiad yr Academi Genedlaethol ar gyfer Arweinyddiaeth Addysgol yw sicrhau bod Cymru’n lle gwych i arweinwyr addysgol ac y byddwn, trwy ledaenu sgiliau arwain rhagorol ledled y system addysg, yn gwireddu uchelgais feiddgar ein cenedl ar gyfer dysgwyr.
Mae datblygu arweinwyr effeithiol yn rhan ganolog o’r daith i ddiwygio addysg yng Nghymru ac mae’n ganolog i’r gwaith rydym yn ei gyflawni drwy ein model Cymdeithion blaenllaw. Mae ein gweledigaeth ar gyfer 2026 yn disgrifio arweinwyr y system fel pobl sy’n hybu hunan-welliant, lle mae gweithwyr proffesiynol yn cydweithio ac yn arwain y tu hwnt i strwythurau sefydliadol, rhwng haenau ac ar draws sectorau.
Ar gyfer y rownd nesaf hon o Gymdeithion, mae gennym ddiddordeb arbennig mewn penodi uwch arweinwyr o amrywiol leoliadau addysgol ledled Cymru gan gynnwys:
- Penaethiaid Cynorthwyol
- Dirprwy Benaethiaid
- Penaethiaid
- Uwch arweinwyr o’r sector gwaith ieuenctid
- Uwch arweinwyr o Addysg a Hyfforddiant Ôl-orfodol (gan gynnwys addysg bellach, dysgu oedolion yn y gymuned a dysgu seiliedig ar waith).
Mae’r Academi Genedlaethol ar gyfer Arweinyddiaeth Addysgol yn ceisio penodi Cymdeithion o blith grwpiau sydd wedi’u tangynrychioli gan gynnwys pobl Ddu a Mwyafrif Byd-eang ym mhob sector.
Dyddiad cau ar gyfer ceisiadau 10 Mai.
Dysgwch fwy am rôl y Cydymaith a sut i wneud cais yn ein canllaw ymgeisio.
Pam ddylwn i ymgeisio?
Mae dros 70 o uwch arweinwyr yn y sector addysg wedi elwa o fod yn Gydymaith yr Academi Genedlaethol ar gyfer Arweinyddiaeth Addysgol ers 2018. Yn ystod eu cyfnod, mae’r cymdeithion wedi cael eu trochi mewn cyfleoedd dysgu proffesiynol o’r ansawdd uchaf sydd ar gael ym mhob rhan o Gymru a thu hwnt.
Bydd ymgeiswyr llwyddiannus eleni yn aelodau o’r chweched garfan o Gymdeithion a byddant yn cymryd rhan mewn profiadau dysgu proffesiynol go iawn a fydd yn eu datblygu fel arweinwyr system gredadwy ac effeithiol, gan arwain y dysgu yn eu lleoliadau eu hunain a thu hwnt.
Fel Cydymaith o fewn carfan 7 byddwch yn mwynhau:
- Profiadau dysgu proffesiynol, preswyl yn cynnwys sesiynau dan arweiniad Cymdeithion presennol, staff ac arbenigwyr arweinyddiaeth, sy’n canolbwyntio ar sgiliau arwain systemau allweddol gan gynnwys eiriolaeth, hwyluso, porthgadw a gwella.
- Y cyfle i gwblhau comisiwn ymchwil cydweithredol yn canolbwyntio ar un o flaenoriaethau allweddol taith addysg Cymru.
- Gweminarau gan arweinwyr cydnabyddedig o bob rhan o’r byd, gyda chynnwys wedi’i dargedu’n benodol at ffocws eich comisiwn. Mae siaradwyr blaenorol wedi cynnwys: Yr Athro Steve Munby CBE, yr Athro Mick Waters, yr Athro Laura McAllister CBE, yr Athro Michael Fullan, yr Athro Ken Muir, yr Athro Graham Donaldson, a Diana Osagie.
- Bod yn rhan o’r panel sy’n sicrhau ansawdd darpariaeth datblygu arweinyddiaeth ar gyfer y sector addysg yng Nghymru.
- Y cyfle i herio a dylanwadu ar bolisi addysg trwy ymgysylltu ag uwch swyddogion y llywodraeth.
- Mynediad blaenoriaethol i holl ddigwyddiadau’r Academi Genedlaethol ar gyfer Arweinyddiaeth Addysgol a chyfle i ddatblygu eich sgiliau hwyluso ymhellach trwy arwain grwpiau trafod a hwyluso sesiynau cwestiwn ac ateb gydag enwau amlwg o’r byd arweinyddiaeth.
Ymrwymiad amser
Bydd yr ymrwymiad amser disgwyliedig i gyflawni’r rôl yn amrywio ar draws wythnosau, yn ôl diddordeb ac arbenigedd y Cydymaith, mewn egwyddor mae’n cyfateb i 1 diwrnod yr wythnos a bydd yn cynnwys pedwar profiad dysgu preswyl 2 ddiwrnod, a chyfarfodydd bob hanner tymor (2 awr ar-lein), gweminarau tymhorol, cynadleddau a gweithgarwch sicrhau ansawdd parhaus.
Dyddiadau allweddol:
- Dyddiad cau ar gyfer ceisiadau – 10 Mai 2024 12:00 canol dydd
- Cyfweliadau panel dethol – Mehefin 2024
- Hysbysu ymgeiswyr o ganlyniad y panel dethol – 21 Mehefin 2024
- Rôl Cymdeithion yn dechrau – 1 Medi 2024
I wneud cais cwblhewch y ffurflen gais a’i hanfon i post@agaa.cymru.
I gael rhagor o wybodaeth am yr uchod, cysylltwch â Mark Isherwood ar mark.isherwood@agaa.cymru.